मासिक राशिफल - धनु

धनु राशिलाई फागुन महिना उत्साहवर्द्धक रहनेछ। पेसा–व्यवसायमा राम्राे फाइदा मिल्नेछ। विद्यार्थीहरूको अध्ययनमा प्रगति हुनुका साथै लेखनकलामा निखारता आउनेछ। नोकरीमा प्रवेश, पदोन्नति वा अनुकूल स्थान प्राप्त हुने समय छ। प्रतिष्ठित व्यक्तिले हौसला प्रदान गर्नेछन्। बल, तेज, पराक्रम बढ्नाले चुनौतीका पहाड चिर्ने आँट जाग्नेछ। प्रतिस्पर्धीहरूले हार खानेछन्। शत्रु र रोगबाट छुटकारा पाइनेछ। स्रोत–साधन जुट्नाले महत्त्वाकांक्षी काम थालनी गर्न सकिनेछ। रोकिएका काम सम्पादन गर्ने समय छ। घरमा सुख–समृद्धि बढ्नेछ। भूमिलगायत स्थायी सम्पत्ति अभिवृद्धि हुने सम्भावना छ। कृषितर्फ नयाँ प्रविधि भित्र्याउने समय छ। आवश्यक भौतिक साधन र उपकरण संग्रह गर्न सकिनेछ। दाजुभाइमा भने केही असमझदारी बढ्न सक्छ, सबैलाई समेटेर अघि बढ्नुहोला।