साउनयता नौ गैंडाले गुमाए ज्यान - nagariknews.nagariknetwork.com

चितवन राष्ट्रिय निकुञ्ज र आसपासका क्षेत्रमा साउनयता नौ गैंडा मरेका छन्। निकुञ्ज क्षेत्र र मध्यवर्ती सामुदायिक वन क्षेत्र एवं आसपासमा ती गैंडा मरेका हुन्।चितवन राष्ट्रिय निकुञ्जका सूचना अधिकारी अविनाश थापा मगरका अनुसार साउनयता पाँच भाले र तीन पोथी गैँडा मरेका हुन्। उनले एउटाको लिङ्ग पहिचान हुन नसकेको बताए। मरेका गैँडामध्ये विद्युतीय करेन्ट लागेर एक र अन्य सबै प्राकृतिक कारणले मरेका उनको भनाइ छ।पछिल्लो पटक पुस २२ गते एउटा भाले गैँडा मरेको जनाउँदै मगरले कुमरोज मध्यवर्ती सामुदायिक वनमा अन्दाजी ३५ वर्षको भाले गैँडा मृत भेटिएको बताए।“यो गैँडा जुधेर मरेको अनुमान छ। गैँडाको खाग, खुर सुरक्षित अवस्थामा थियो”, उनल भने।हरेक वर्ष गैँडा विभिन्न कारणले मर्ने गरेकामा प्राकृतिक रूपमा, विद्युतीय करेन्ट लागेर तथा एकापसमा जुधेर, दलदलमा फसेर लगायत प्रमुख कारणले मर्ने गरेका निकुञ्जका सूचना अधिकारी मगरले बताए।उनका अनुसार यस निकुञ्जमा पछिल्लो गणनाअनुसार ६९४ गैँडा छन्।यसैबीच नारायणगढ–माडी–ठोरी हुलाकी सडकखण्ड अन्तर्गत चितवन राष्ट्रिय निकुञ्जको सडकमा टायल बिछ्ययाउन थालिएको छ। माडीतर्फबाट ३४ मिटर सडकमा परीक्षणस्वरूप टायल बिछ्याउन थालिएको हो।माडी नगरपालिकाका प्रमुख प्रशासकीय अधिकृत जगतप्रसाद भुसालका अनुसार निकुञ्ज क्षेत्रमा टायल बिछ्याउँदा प्रभावकारिता कतिको हुन्छ भन्ने परीक्षणस्वरूप काम सुरु गरिएको हो।नगरपालिकाको १० लाख लागतमा सडकमा टायल बिछ्याउने काम भइरहेको उनले बताए।उनले भने, “सुरुआतमा परीक्षणस्वरूप कम क्षेत्रमा काम गर्न लागिएको हो। यो काम सफल भएमा पुनः अन्य क्षेत्रमा विस्तार गरिनेछ।”चितवन राष्ट्रिय निकुञ्जका सूचना अधिकारी मगरका अनुसार वन तथा वातावरण मन्त्रालयमा सहमति भएर विभाग हुँदै पत्र आएपछि टायल बिछ्याउने काम सुरु गर्न अनुमति दिइएको हो।उनले भने, “सुरुमा ३४ मिटर परीक्षणस्वरुप काम गर्न दिइएको छ।”यो परीक्षण सफल भएमा निकुञ्जको सडकमा पर्ने देउरालीसम्म नगरपालिकाको बजेटबाट टायल राख्ने काम गर्ने भन्ने सहमति भएको उनले बताए।माडी नगरपालिकाका उपप्रमुख खेमप्रसाद महतोले निकुञ्जभित्रको सडकमध्ये अहिले ३४ मिटरमामा टायल बिछ्याइने र अन्य सडकलाई स्तरोन्नति गरिने बताए। उनले भने, “सुरुआती समयमा परीक्षणस्वरूप थोरै क्षेत्रमा टायल बिछ्याउन लागिएको छ भने अन्य सडकलाई स्तरोन्नति गर्न सुरु गरिएको छ।”अहिले टायल लगाउन आवश्यक संरचना निर्माण सुरु गरिएको उनले बताए।माडीका बासिन्दाले सो सडक कालोपत्र गर्न सरकारलाई दबाब दिँदै आएका छन्। विश्व सम्पदा सूचीमा सूचीकृत निकुञ्जभित्र कालोपत्र गर्न अनुमति लिनुपर्ने भएपछि विकल्पका रूपमा टायल बिछ्याउने सहमति अनुसार काम अघि बढाउन लागिएको नगरपालिका कार्यालयले जनाएको छ।