महिला डाक्टरको हिजाब तानेपछि बिहारका मुख्यमन्त्री नीतीश कुमार विवादमा - janatatimes.com

पटना । बिहारका मुख्यमन्त्री नीतीश कुमार सोमबार एक नवनियुक्त आयुष महिला डाक्टरको हिजाब तानेपछि विवादमा फसेका छन्। यो घटनालाई लिएर विपक्षी दलहरूले नीतीश कुमारलाई निशाना बनाउँदै ‘मानसिक रूपमा अस्थिर’ भएको आरोप लगाएका छन्। सामाजिक सञ्जालमा भाइरल भइरहेको एउटा भिडियोमा नीतीश कुमारले नियुक्ति पत्र दिने क्रममा एक मुस्लिम महिला आयुष डाक्टरको अनुहारबाट हिजाब तानिरहेको देखिन्छ। मुख्यमन्त्रीले यस्तो गरिरहेको बेला पछाडि उभिएका बिहारका उप-मुख्यमन्त्री सम्राट् चौधरीले उनलाई रोक्न खोजेको भिडियोमा देखिन्छ। तर, बिहारका स्वास्थ्य मन्त्री मंगल पाण्डेसहित मुख्यमन्त्रीका प्रधान सचिव दीपक कुमार भने हाँसिरहेको देख्न सकिन्छ। हिजाबमा आएकी नवनियुक्त डाक्टर नियुक्ति पत्र लिन मञ्चमा पुग्दा ७५ वर्षीय मुख्यमन्त्रीले सोधे, ‘यो के हो?’ त्यसपछि उनी हल्का झुकेर हिजाब तल तान्न पुगेका थिए। विपक्षी दलहरूको कडा आलोचना विपक्षी पार्टीहरू कांग्रेस र राष्ट्रिय जनता दल (राजद) ले यो घटनाको भिडियो क्लिप सामाजिक सञ्जालमा सेयर गर्दै नीतीश कुमारमाथि निशाना साधेका छन्। कांग्रेस ले आफ्नो एक्स अकाउन्टमा भिडियो पोस्ट गर्दै लेखेको छ, ‘यी बिहारका मुख्यमन्त्री नीतीश कुमार हुन्। उनको बेशर्मी हेर्नुहोस्। एक महिला डाक्टर नियुक्ति पत्र लिन आउँदा उनको हिजाब तानिदिए।’ कांग्रेसले यो घटिया कामका लागि नीतीश कुमारले तत्काल राजीनामा दिनुपर्ने माग गरेको छ। बिहारको मुख्य विपक्षी पार्टी राजद ले लेखेको छ, ‘नीतीशजीलाई यो के भयो? मानसिक स्थिति बिल्कुलै दयनीय अवस्थामा पुगिसकेको छ।’ जम्मु कश्मीरकी पूर्व मुख्यमन्त्री महबूबा मुफ्तीले पनि यस घटनालाई लिएर नीतीश कुमारमाथि निशाना साधेकी छिन्। उनले इन्स्टाग्राममा लेखिन्, ‘यसलाई उमेरको प्रभाव भन्नुहोस् वा मुस्लिमहरूको सार्वजनिक अपमानलाई सामान्यीकरण भन्नुहोस्। यो अझ विचलित पार्ने कुरा हो कि उनको वरपरका मानिसहरूले यो भयानक घटनालाई मनोरञ्जन जस्तै हेरिरहे।’ उनले थप भनिन्, ‘नीतीश सर, सायद अब तपाईंले आफ्नो पद छोड्ने समय आएको छ।’ देवबन्दी मौलवी कारी इसहाक गोराले समाचार एजेन्सी पीटीआईसँग कुरा गर्दै भनेका छन्, ‘यसलाई देखेर मेरो मात्र होइन, पूरै देशको जनताको रगत उम्लिएको होला। यस मामिलामा नीतीश कुमारले पूरै देशका महिलाहरूसँग माफी माग्नुपर्छ।’ यद्यपि, जेडीयूका प्रवक्ता नीरज कुमारले मुख्यमन्त्रीको बचाउ गर्दै कुनै खास भिडियो क्लिपलाई विपक्षी दलहरूले अनावश्यक रूपमा उछाल्नु नहुने बताएका छन्। उनले नीतीश कुमारले बिहारमा महिला र अल्पसंख्यकको भलाइका लागि धेरै काम गरेको दाबी गरेका छन्।