ट्रम्पले नेतान्याहूलाई ‘तपाईं किन सधैं नकारात्मक?’ भन्दै हप्काए - nagariknews.nagariknetwork.com

अमेरिकी राष्ट्रपति डोनाल्ड ट्रम्पले इजरायली प्रधानमन्त्री बेन्जामिन नेतान्याहूलाई फोनमा हप्काएका छन्। गाजा युद्ध अन्त्य गर्ने ट्रम्पको २० बुँदे योजनालाई हमासले आंशिक रूपमा स्वीकार गरेको छ। ट्रम्पले यसलाई सकारात्मक मानेका छन्। तर नेतान्याहूले यो ठूलो कुरा नभएको बताउँदै आएका छन्। अन्तराष्ट्रिय सञ्चारमाध्यमका अनुसार रिसाएका ट्रम्पले फोनमा भने, ‘मलाई थाहा छैन तपाईं किन सधैं यति नकारात्मक हुनुहुन्छ। यो विजय हो, यसलाई स्वीकार गर्नुहोस्।’ सामाजिक सञ्जालमा ट्रम्पले सप्ताहन्तमा हमास र विश्वका धेरै देशसँग ‘धेरै राम्रो’ छलफल भएको बताए, जसको उद्देश्य गाजा युद्ध अन्त्य गर्नु, बन्धक मुक्त गर्नु र मध्य पूर्वमा शान्ति ल्याउनु हो। ट्रम्पले भने, ‘वार्ता राम्रोसँग चलिरहेको छ। म यो पुरानो विवादमा नजर राख्नेछु। समय बहुमूल्य छ, अन्यथा ठूलो क्षति हुनेछ, जुन कसैले चाहँदैन।’ ट्रम्पको २०-बुँदे योजना सेप्टेम्बर २९ मा प्रस्तुत गरिएको थियो। यसले बन्धक मुक्त गर्न, गाजामा लडाइँ रोक्न र मध्य पूर्वमा शान्ति स्थापना गर्न लक्ष्य राखेको छ। एजेन्सी