बीबीसीविरुद्ध अमेरिकी राष्ट्रपति ट्रम्पले हाले मुद्दा, पाँच अर्ब डलर क्षतिपूर्ति माग - corporatekhabar.com

काठमाडौं । अमेरिकी राष्ट्रपति डोनाल्ड ट्रम्पले जनवरी ६, २०२१ मा पानोरामा वृत्तचित्रमा दिएको भाषणको सम्पादनलाई लिएर बीबीसी विरुद्ध मानहानी मुद्दा दायर गरेका छन् । ट्रम्पले ५ अर्ब डलर क्षतिपूर्ति माग गर्दै फ्लोरिडाको मियामीस्थित अदालतमा मुद्धा दायर गरेका हुन् । भाषण सम्पादन गरेको प्रकरणमा बीबीसीले गत नोभेम्बरमा ट्रम्पसँग माफी मागेको थियो तर उनको क्षतिपूर्तिको माग अस्वीकार गरेको थियो । ट्रम्पको कानुनी टोलीले बीबीसीले उनको भाषणलाई ‘जानाजानी, दुर्भावनापूर्ण र भ्रामक रूपमा परिवर्तन’ गरेर उनको छविलाई क्षति पुर्‍याएको आरोप लगाएको छ । दायर गरिएका कागजातहरू अनुसार, ट्रम्पले बीबीसीविरुद्ध मानहानि र फ्लोरिडाको व्यापार अभ्यास कानून उल्लङ्घनको अर्को आरोपमा मुद्दा दायर गरिरहेका छन् । ट्रम्पले गत महिनानै जनवरी ६ मा उनको भाषण पानोरामा वृत्तचित्रको भागको रूपमा सम्पादन गरिएको तरिकामा बीबीसी विरुद्ध मुद्दा दायर गर्ने योजना बनाएको बताएका थिए । जनवरी ६, २०२१ मा आफ्नो भाषणमा, ट्रम्पले वाशिंगटनमा समर्थकहरूलाई भने, ‘हामी क्यापिटलमा मार्च गर्नेछौं र हामी हाम्रा बहादुर सिनेटरहरू, कांग्रेसीहरू र महिलाहरूलाई समर्थन गर्नेछौं ।’ भाषणको ५० मिनेटभन्दा बढी समयपछि, उनले थपे, ‘र हामी लड्नेछौं । हामी हाम्रो सम्पूर्ण शक्तिले लड्नेछौं ।’ बीबीसीको पानोरामा कार्यक्रमको एउटा क्लिपमा ट्रम्पले यसो भनिरहेको देखाइएको थियो, ‘हामी क्यापिटलमा मार्च गर्नेछौं… र म त्यहाँ तपाईंसँगै हुनेछु र हामी लड्नेछौं । हामी हाम्रो सम्पूर्ण शक्तिले लड्नेछौं ।’ बीबीसीले सम्पादनमा गल्ति भएको स्वीकार गर्दै मानिसहरूलाई हिंसात्मक कारबाहीको लागि प्रत्यक्ष अपील गरेको गलत धारणा सिर्जना गरेको स्वीकार गरेको थियो । यस प्रकरणमा बीबीसीका महानिर्देशक टिम डेभी र समाचार प्रमुख डेबोरा टर्नेसले राजीनामा समेत दिएका थिए । The post बीबीसीविरुद्ध अमेरिकी राष्ट्रपति ट्रम्पले हाले मुद्दा, पाँच अर्ब डलर क्षतिपूर्ति माग appeared first on corporatekhabar : Nepals first corporate news magazine and portal.