ऊर्जामन्त्री घिसिङ भन्छन्- १०,८०० मेगावाटको कर्णाली चिसापानी आयोजनाको अध्ययन गर्दै छौँ - nepalnews.com

कैलाली। ऊर्जा, जलस्रोत तथा सिँचाइमन्त्री कुलमान घिसिङले १०‚८०० मेगावाटको कर्णाली चिसापानी जलाशययुक्त जलविद्युत् आयोजनाको विस्तृत इन्जिनियरिङ अध्ययन गर्न लागिएको बताएका छन्। कैलालीको जानकी गाउँपालिकाको दुर्गौलीमा मंगलबार आयोजित कार्यक्रममा उनले सदूरपश्चिम प्रदेश मात्र नभएर समग्र देशकै आर्थिक समृद्धिसँग जोडिएको कर्णाली चिसापानीको विस्तृत परियोजना प्रतिवेदन (डीपीआर) नेपाल विद्युत् प्राधिकरणमार्फत तयार पार्न लागिएको उल्लेख गरे। विगतमा सन् २००१ भित्र निर्माण सम्पन्न गर्ने गरी सम्भाव्यता भएको तर आयोजना अगाडि बढ्न नसकेको उल्लेख गर्दै मन्त्री घिसिङले मुलकको समृद्धिसँग जोडिएका कर्णाली चिसापानीजस्ता मेगा परियोजना अगाडि बढाउनुपर्ने र उक्त आयोजनालाई दक्षिण एसियाली क्षेत्रकै नमुना आयोजनाको रुपमा विकास गर्न सकिने बताए। सरकारले कर्णाली चिसापानी नेपाल प्राधिकरणमार्फत अध्ययन गराउने निर्णय गरिसकेको छ । प्राधिकरणले विस्तृत अध्ययनका लागि परामर्शदाता छनोटको प्रक्रिया अगाडि बढाएको छ । कर्णाली चिसापानी आयोजना बनेपछि नदीको प्रवाह नियन्त्रण हुने हुँदा अहिले रहेको नदी कटानको समस्या पनि दीर्घकालीन रुपमा समाधान हुने घिसिङको भनाइ छ। उनले रानी जमरा कुलरिया सिँचाइ आयोजनाको ४.७१ मेगावाट जलविद्युतगृह सञ्चालन गर्न स्थानीय जनता, उपभोक्ता समितिलगायतको सेयर स्वामित्व रहने गरी कम्पनी खोल्ने प्रक्रिया अगाडि बढाइसकेको पनि जानकारी दिए। कम्पनी खोल्न सहमतिका लागि अर्थ मन्त्रालयमा पठाइएको जानकारी दिँदै मन्त्री घिसिङले अर्थबाट सहमति आएपछि मन्त्रिपरिषद्‌बाट निर्णय गराइ कम्पनी संस्थापनाको प्रक्रिया अगाडि बढ्ने बताए। उनले जलविद्युत् र पर्यटनको विकासमार्फत सुदूरपश्चिम प्रदेशको आर्थिक समृद्धि हासिल गर्न सकिने उल्लेख गरे।