एपिक गेम्स फोर्टनाइट अमेरिकाको प्लेस्टोरमा पुन: फर्कियो - www.technologykhabar.com

एपिक गेम्सको लोकप्रिय ब्याटल रोयाल खेल फोर्टनाइट अदालतको आदेशपछि पुनः अमेरिकी गुगल प्लेस्टोरमा फर्किएको छ। खेल डेभलपरले इन–एप खरीदबाट हुने आम्दानीको प्रतिशतबारेको विवादका कारण गुगलसँग पाँच वर्ष लामो कानुनी लडाइँ हालै मात्र सुल्झाएको थियो। तर यही विषयमा एप्पलविरुद्ध चलिरहेको मुद्दामा भने कम्पनीले केही कमजोरी भोग्नुपरेको छ। एपिक गेम्सले सन् २०२० मा आईओएस र एण्ड्रोइडमा रहेका विद्यमान इन–एप भुक्तानी प्रणालीलाई बाइपास गर्ने संस्करण सार्वजनिक गरेपछि एप्पल र गुगल दुवैले फोर्टनाइटलाई आफ्ना एप स्टोरबाट हटाएका थिए। त्यसपछि एपिक गेम्सले दुवै कम्पनीविरुद्ध प्रतिस्पर्धाविरोधी मुद्दा दायर गरेको थियो। एप्पलको मामिलामा अदालतले कम्पनीलाई ‘एकाधिकारवादी’ नभने पनि डेभलपरले चाहेसम्म अन्य भुक्तानी माध्यमतर्फ प्रयोगकर्तालाई देखाउन पाउनुपर्ने फैसला सुनाएको थियो। तर एप्पलले उक्त निर्णयका केही शर्तहरूमाथि चुनौती दिइरहेको थियो जसमध्ये केही हालै पुनरावेदन अदालतले “अति व्यापक” भन्दै उल्टाएको छ। नयाँ आदेशअनुसार एप्पलले विकासकर्तालाई आफ्नो बाहिरी भुक्तानी लिंकहरू एप्पलका लिंकहरूभन्दा ठूलो वा बढी ध्यान खिच्ने बनाउने अनुमति छैन। साथै एप्पलले आफ्नै एप स्टोर बाहिर गरिएका खरीदहरूमा पनि शुल्क लिन पाउनेछ। यो निर्णय विकासकर्ताका लागि ठूलो झट्का मानिएको छ किनकि उनीहरूले लामो समयपछि मात्र एप्पलको कमीशनलाई पाखा लगाउन थालेका थिए। यसैबीच, गुगल सँगको अदालतको मुद्दामा एपिक गेम्स विजयी भएको र गुगल ले प्रतिस्पर्धाविरोधी व्यवहार गरेको ठहर भएपछिको सम्झौतामार्फत फोर्टनाइटको गुगल प्ले स्टोरमा पुनरागमन सम्भव भएको हो। सम्झौता अनुसार गुगलले विकासकर्तालाई वैकल्पिक भुक्तानी विकल्पहरू देखाउन दिनेछ र लिने शुल्कमा पनि सीमाहरू लागू हुनेछ। एपिक गेम्सका सीईओ टिम स्वीनीले यस सम्झौतालाई एण्ड्रोइडलाई खुला प्लेटफर्मका रूपमा मजबुत बनाउने “समग्र समाधान” भनेर वर्णन गरेका छन्। The post एपिक गेम्स फोर्टनाइट अमेरिकाको प्लेस्टोरमा पुन: फर्कियो appeared first on Technology Khabar.