चुनावी तयारीमा जुट्यो एमाले - nagariknews.nagariknetwork.com

प्रतिनिधिसभा पुनर्स्थापना माग गर्दै सर्वोच्च अदालत पुगेको नेकपा एमाले अन्ततः चुनावी तयारीमा लागेको छ। चुनावी वातावरण अझै नबनेको बताउँदै आएको एमाले अन्य दलहरूले भन्दा आगडि नै उम्मेदवार सिफारिस प्रक्रियादेखि घोषणापत्र मस्यौदा लेखन कमिटी र निर्वाचन परिचालन कमिटी बनाएर देश दौडाहमा लाग्ने तयारीमा लागेको हो।‘चुनावी वातावरण बन्यो भने एमाले अब देश दौडाहमा लाग्छ’, सचिवालय बैठकमा अध्यक्ष केपी शर्मा ओलीले भनेका छन्। ओलीले यस्तो भनेपछि सचिवालयले निर्वाचन तयारीमा लाग्ने निर्णय गरेको छ। यो निर्णयसँगै पार्टी पूर्ण रुपमा निर्वाचनमा होमिएको नेताहरुले बताएका छन्।सचिवालय बैठकमा नेताहरुले वातावरण बनिनसकेको भए पनि चुनावमा जाने निर्णय गर्नुपर्ने धारणा राखेका थिए । जेनजी आन्दोलन छानबिन गर्न बनेको जाँचबुझ आयोगले ओलीलाई लगाएको स्थानहद फुकुवा गरेसँगै एमालेले देशभर चुनावी कार्यक्रमको तयारी थालेको छ।सचिवालय बैठक मंगलबार ललितपुरको च्यासस्थित केन्द्रीय कार्यालयमा बसेको थियो। बैठकमा अध्यक्ष ओलीले देशभर एकैपटक निर्वाचन नहुन सक्ने भएकाले नेताहरुलाई सचेत रहन र कार्यकर्तालाई त्यसै अनुसार परिचालन गर्न निर्देशन दिए। उनले चुनावमा गडबडी हुन सक्ने भएकाले सबै सचेत रहनुपर्ने बताएका हुन्।ओलीले कतिपय नियतवश र कतिपय स्वार्थ बोकेर विदेशी शक्तिको दलालीमा लागेका व्यक्तिहरुले चुनावमा अवरोध गर्न सक्ने टिप्पणी गरेका थिए। ‘कतिपय व्यक्ति नियतवश विनाशकारी भूमिकामा उत्रिएका छन् भने कतिपय स्वार्थ बोकेर ठगी, भ्रष्टाचार र वैदेशिक शक्तिको दलालीमा संलग्न भएका छन्’, ओलीले बैठकमा भनेका थिए।ओलीले विकासका नाममा कतिपय मानिस अन्तर्राष्ट्रिय गैरसरकारी संस्थाको अजेन्डा बोकेर हिँडिरहेको पनि बताएको जानकारी एक नेताले दिए। ‘विकासका नाममा एनजिओ/आइएनजिओका अजेन्डा बोकेर आउनेहरूले राष्ट्रवादी शक्तिहरूलाई योजनाबद्ध रुपमा बदनाम गर्ने षड्यन्त्रका साथ विभिन्न दाग लागेका र अक्षम व्यक्तिहरूलाई एक ठाउँमा जम्मा गरेको देखिन्छ,’ ओलीले भने।गत भदौ २३ र २४ मा भएको जेनजी आन्दोलनको प्रसंग उठाउँदै ओलीले त्यसमा रवि लामिछाने र बालेन साह पनि दोषी भएको दाबी गरेका थिए।बैठकमा ओलीले आफ्नै संयोजकत्वमा उपाध्यक्षहरु रामबहादुर थापा र विष्णु पौडेल, महासचिव शंकर पोखरेल, नेताहरु ईश्वर पाखेरल, प्रदीप ज्ञवाली र विष्णु रिमाल रहेको घोषणापत्र मस्यौदा समिति बनाउन प्रस्ताव गरेका थिए। बैठकले सो प्रस्ताव पारित गरेको छ। त्यस्तै बैठकले पाध्यक्ष रामबहादुर थापाको संयोजकत्वम निर्वाचन परिचालन कमिटी पनि बनाएको छ।निर्वाचन परिचालन कमिटीको सदस्यहरुमा छविलाल विश्वकर्मा, राजन भट्टराई, हिक्मत कार्की, रमेश बडाल, मीनबहादुर शाही र भीष्म अधिकारी छन्। माओवादीबाट एमालेमा समाहित भएका थापालाई निर्वाचन परिचालनको जिम्मा दिइएको हो। ओलीले प्रत्यक्षतर्फ उम्मेदवारी नदिने नेताहरुलाई यो जिम्मेवारी दिएको बताएका छन्। यो जिम्मेवारीमा रहेका भट्टराईले भने तेस्रो पटक काठमाडौं ४ बाट चुनाव लड्ने सोच बनाएका छन्। उनी दुई पटक गगन थापासँग पराजित भएका थिए।एमालेले निर्वाचन अभियान सञ्चालनका लागि प्रदेश इन्चार्ज पनि तोकेको छ। कोसीमा शेरधन राई, मधेसमा लीलानाथ श्रेष्ठ, बागमतीमा महेश बस्नेत, गण्डकीमा खगराज अधिकारी, लुम्बिनीमा पद्मा अर्याल, कर्णालीमा यामलाल कँडेल, सुदूरपश्चिममा गणेश ठगुन्ना र काठमाडौं उपत्यकामा राजन भट्टराईलाई इन्चार्ज तोकिएको छ। बैठकले संगठन विभागको इन्चार्ज भानुभक्त ढकाललाई तोकेको छ। उनी ११ औ महाधिवेशनमा सबैभन्दा कम मत ल्याएर सचिवमा निर्वाचित भएका थिए।पार्टी उपमहासचिवग लेखराज भट्टका अनुसार निर्वाचनमा ७७ जिल्लामा भूगोलकेन्द्रित रहेर केन्द्रीय सदस्यहरूलाई परिचालन गर्ने निर्णय समेत भएको छ। ‘बैठकले पदाधिकारी र केन्द्रीय सदस्यलाई निर्वाचनमा केन्द्रित रहन निर्देश गरेको छ’, भट्टले भने, ‘निर्वाचनमा निर्वाह गर्ने भूमिकाका आधारमा उनीहरूको आगामी जिम्मेवारी निर्धारण गरिनेछ।’एमालेका निर्वाचन क्षेत्र र जिल्ला तहकाअ कमिटीहरूले सम्भावित उम्मेदवारको नाम सिफारिस गरी माथिल्लो कमिटीमा पठाइसकेका छन्। केही जिल्ला र क्षेत्रबाट उम्मेदवार सिफारिस हुन बाँकी छ। सिफारिस गर्न बाँकी कमिटिीलाई चाँडै नाम पठाउन बैठकले आग्रह गरिएको छ।