क्यानडाविरुद्ध नेपालको सानदार जित - bishwokhabar.com
काठमाडौं– नेपालले आईसीसी पुरुष टी–२० विश्वकपको तयारीअन्तर्गत दोस्रो अभ्यास खेलमा पनि जित हात पारेको छ । चेन्नईमा क्यानडाविरुद्ध भएको खेलमा ओपनर आसिफ शेखको अर्धशतकको मद्दतमा नेपाल १२ बल बाँकी हुँदै ६ विकेटले विजयी भयो । टस जितेर ब्याटिङ रोजेको क्यानडाले २० ओभरमा ६ विकेट गुमाउँदै १६१ रन बनाउँदै नेपाललाई १६२ रनको लक्ष्य दिएको थियो । क्यानडाका नवनीत धालिवालले ४१ र शेयस मोव्वाले ३८ रन बनाए । नेपालका लागि कुशल भुर्तेल र सन्दीप लामिछानेले समान २ विकेट लिए भने नन्दन यादव र सोमपाल कामीले १–१ विकेट झारे । जवाफी ब्याटिङमा नेपालले १८औँ ओभरमै लक्ष्य पूरा गर्यो । आसिफ शेखले २९ बलमा ५८ रन बनाए भने सन्दीप जोराले ४४ र गुल्सन झाले ३१ रनको योगदान दिए । यसअघि पहिलो अभ्यास खेलमा नेपालले यूएईलाई पराजित गरेको थियो । अब नेपाली टोली विश्वकप खेल्न मुम्बई जानेछ र तीन दिनपछि इंग्ल्यान्डविरुद्ध आफ्नो यात्रा सुरु गर्नेछ ।