अमेरिकी सैन्य शिविरमा पुटिनलाई भेट्दै ट्रम्प - nagariknews.nagariknetwork.com
अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिन आज अगस्ट १५ मा अलास्कामा भेटवार्ता गर्दै छन्। सात वर्षपछि दुई नेताबिच हुने यो भेटवार्ताको अजेन्डा रुस-युक्रेन युद्ध रोक्नु हो।ट्रम्प-पुटिनको भेटघाट अलास्काको सबैभन्दा ठूलो शहर एन्कोरेजस्थित अमेरिकी सैन्य शिविरमा हुँदै छ। सीएनएनका अनुसार भेटघाटका क्रममा ट्रम्प र पुटिन बाहेक दुई जना मात्र दोभाषे हुने छन्। दुई जनाबिच के छलफल हुने छ भन्ने विवरण खुलाइएको छैन। भेटवार्तापछि दुवै नेताले पत्रकार सम्मेलन गर्ने छन्।वार्ताअघि रुस र युक्रेनबिच तिखो बयानबाजी सुरु भएको छ। पुटिन रुसले कब्जा गरेको युक्रेनको लगभग २० प्रतिशत भाग रुसमा समावेश गर्न चाहन्छन्। साथै, जेलेन्स्की युक्रेनको एक इन्च पनि भूमि दिन तयार छैनन्।२०२२ देखि चलिरहेको रुस-युक्रेन युद्ध अन्त्य गर्ने विषयमा वार्ता सुरु गर्न ट्रम्प र पुटिन भेट्दै छन्। ट्रम्पले २०२३-२४ को राष्ट्रपति चुनाव अभियानका क्रममा धेरै पटक वाचा गरेका थिए कि उनी राष्ट्रपति बनेको २४ घण्टाभित्र रुस-युक्रेन युद्ध अन्त्य गर्ने छन्। राष्ट्रपति बनेको ६ महिनाभन्दा बढी भइसक्यो तर ट्रम्पको वाचा अझै पूरा भएको छैन।यसको विपरीत रुसले युक्रेनमा हवाई आक्रमण तीव्र बनायो। यसबाट रिसाएर ट्रम्पले रुसलाई शान्ति सम्झौताको वार्ता गर्न ५० दिनको समय दिए। यदि तत्काल युद्धविराममा सहमति भएन भने ट्रम्पले थप कडा अमेरिकी प्रतिबन्धहरू लगाउने चेतावनी दिए। यो समयसीमा अगस्ट ८ मा समाप्त भयो।समयसीमा भन्दा दुई दिन अगाडि अगस्ट ६ मा अमेरिकी विशेष दूत स्टिभ विटकफले मस्कोमा पुटिनलाई भेटे। यो भेटपछि ट्रम्प र पुटिनबिच भेटघाटको योजना बनाइएको थियो। अगस्ट ८ मा ट्रम्पले भेटघाटको घोषणा गरे।बीबीसीका अनुसार ट्रम्प र पुटिन अलास्कामा भेट्नुको सबैभन्दा ठूलो कारण सुरक्षा हो। अलास्काको मुख्य भूमिको सबैभन्दा नजिकको भाग रुसको चुकोटकाबाट केवल ९० किलोमिटर टाढा छ। पुटिन कुनै पनि 'शत्रु' देशमाथि उडान नगरी त्यहाँ पुग्न सक्छन्।यस क्षेत्रमा केही रुसी वायुसेना अड्डाहरू र सैन्य निगरानी स्टेशनहरू छन्, जहाँ आणविक हतियारहरू पनि हुन सक्छन्। पुटिनलाई यहाँ भेट्नु सुरक्षित हुनेछ।दोस्रो कारण दूरी हो। अलास्का युक्रेन र युरोपबाट धेरै टाढा छ। यो पुटिनको सोचसँग मेल खान्छ, जसमा उनी किभ र युरोपेली संघका नेताहरूलाई संलग्न नगरी अमेरिकासँग सिधै कुरा गर्न चाहन्छन्।