जर्मनी अन्तर्राष्ट्रिय सार्वजनिक प्रसारण संस्थाप्रति रुसकाे कडा टिप्पणी - www.sutranews.com

काठमाडाैं । रूसले जर्मनीको अन्तर्राष्ट्रिय सार्वजनिक प्रसारण संस्था डोयचे वेले (डीडब्ल्यू) लाई आफ्नो ‘अवाञ्छित संस्था’ को सूचीमा समावेश गरेको छ। यस निर्णयसँगै रूसभित्र डीडब्ल्यूको कुनै पनि गतिविधि कानुनी रूपमा प्रतिबन्धित भएको छ। रूसी न्याय मन्त्रालयले डीडब्ल्यूलाई उक्त सूचीमा राखिएको औपचारिक जानकारी दिएको हो। यसअनुसार अब रूसी नागरिक वा संस्थाले डीडब्ल्यूसँग सहकार्य गर्न, यसको सामग्री उत्पादन वा प्रसारण गर्न, साझा गर्न तथा आर्थिक सहयोग गर्न पाइने छैन। रूसी कानुनअनुसार यस्तो कार्यलाई अपराध मानिनेछ र दोषी ठहरिएमा कानुनी सजायको व्यवस्था गरिएको छ। यस निर्णयप्रति प्रतिक्रिया जनाउँदै डोयचे वेलेकी निर्देशक बारबरा मासिङले यसलाई स्वतन्त्र पत्रकारितामाथिको दबाबको संज्ञा दिएकी छन्। उनका अनुसार यो कदम अभिव्यक्ति र सञ्चार स्वतन्त्रतालाई कमजोर पार्ने प्रयास हो। यद्यपि, उनले डीडब्ल्यूले अन्तर्राष्ट्रिय मापदण्डअनुसार निष्पक्ष र स्वतन्त्र समाचार सम्प्रेषण जारी राख्ने प्रतिबद्धता दोहोर्‍याइन्। विशेषगरी युक्रेनमा जारी युद्ध तथा अन्य अन्तर्राष्ट्रिय विषयमा डीडब्ल्यूले तथ्यमा आधारित समाचार प्रदान गरिरहेको उनको भनाइ छ। डोयचे वेले यसअघि नै रूसमा ‘विदेशी एजेन्ट’को रूपमा सूचीकृत भइसकेको थियो। त्यसपछि रूसभित्र यसको रेडियो, टेलिभिजन प्रसारण तथा वेबसाइटहरू लामो समयदेखि अवरुद्ध छन्। नयाँ ‘अवाञ्छित संस्था’को निर्णयले भने डीडब्ल्यूविरुद्ध कानुनी कठोरता अझै बढाएको विश्लेषण गरिएको छ। रूसी अधिकारीहरूले यस कदमलाई राष्ट्रिय सुरक्षा र संवैधानिक व्यवस्थामा सम्भावित असर का आधारमा लिइएको बताएका छन्। तर पश्चिमी देशका नेताहरू तथा प्रेस स्वतन्त्रतासम्बन्धी अन्तर्राष्ट्रिय संस्थाहरूले यस निर्णयको आलोचना गरेका छन्।