परम्परा, पहिचान र पर्यटन: सुदूरपश्चिम महोत्सवको विशेष महत्व - www.nepaliheadline.com

सुदूरपश्चिम महोत्सव केवल सांस्कृतिक उत्सव मात्र होइन, प्रदेशको पहिचान, सम्भावना र समृद्धिको प्रतीकका रूपमा विकसित हुँदै गएको छ। प्रत्येक वर्ष यस महोत्सवले स्थानीय संस्कृति, परम्परा, कला, कृषि उत्पादन र पर्यटनका सम्भावनाहरूलाई एकै स्थानमा उजागर गर्छ, जसले प्रदेशभित्रै मात्र होइन, राष्ट्रिय तहमा पनि सुदूरपश्चिमको पहिचानलाई मजबुत बनाइदिन्छ। ‘समृद्ध सुदुरपश्चिमको लागि आर्थिक समृद्धी’ भन्ने मुल नाराका साथ २०६३ सालदेखि मनाउदै आइरहेको सुदुरपश्चिम महोत्सव यहाका लागि महोत्वस मात्रै नभएर पर्व समेत हो । प्रत्येक बर्ष मंसिर २२ गतेदेखि पौष २ गतेसम्म आयोजना हुने सुदुरपश्चिम महोत्सवका लागि प्रदेश बाहिर रहेकाहरु समेत महोत्सव अवलोकनका लागि आउने गर्दछन । १. सांस्कृतिक पहिचानको संरक्षण सुदूरपश्चिमका जातजाति, भाषा, भेषभूषा र परम्परागत नृत्य–गीत महोत्सवका मुख्य आकर्षण हुन्। देउडा, झ्याउरे, चौतारो, बुढो नाँच, बर्से नृत्यजस्ता मौलिक कला प्रस्तुतिले लोप हुँदै गएको संस्कृतिको संरक्षणमा महत्त्वपूर्ण योगदान पुर्‍याउँछ। २. पर्यटन प्रवर्द्धनको ठूलो अवसर महोत्सवले सुदूरपश्चिमका पर्यटकीय गन्तव्य—खप्तड, अपी सैपाल, वेदकोट ताल, शुक्लाफाँटा, महाकाली किनारा, बडीकेदार, उग्रतारा—लगायत स्थानहरूलाई राष्ट्रिय तथा अन्तर्राष्ट्रिय पर्यटकसमक्ष पहिचान गराउने सुनौलो प्लेटफर्म प्रदान गर्छ। महोत्सवकै कारण धेरै पर्यटक पहिलोपटक सुदूरपश्चिमका स्थलहरू अवलोकन गर्न प्रेरित हुने तथ्य छुट्टै महत्वपूर्ण छ। ३. स्थानीय उत्पादन र व्यवसायिक अवसर प्रदेशका स्थानीय कृषिजन्य उत्पादन—अलैची, अदुवा, अम्चुर, स्थानीय फलफूल, कुखुरा–बाख्रापालन, लगायत—सहित हस्तकला, ढुड्का, लोककला तथा घरेलु सामग्री व्यापारमा ठूलो प्रशार–प्रसार पाउँछन्। यसले स्थानीय उद्यमीलाई बजार विस्तार, आयआर्जन र व्यवसायिक परिचय बढाउने अवसर प्रदान गर्छ। ४. आर्थिक गतिविधि बढ्ने महोत्सवका कारण होटल, यातायात, क्याब, रेस्टुरेन्ट, होमस्टे र स्थानीय दुकानहरूको व्यस्तता बढ्छ। छोटो समयमै लाखौँ रुपैयाँको आर्थिक क्रियाकलाप बढ्ने भएकाले यसले प्रदेशको आन्तरिक अर्थतन्त्रमा प्रत्यक्ष योगदान पुर्‍याउँछ। ५. सामाजिक एकता र सहभागिता यो महोत्सव प्रदेशका सबै जात–धर्म, समुदाय र उमेर समूहलाई एउटै मञ्चमा ल्याउने माध्यम हो।
साझेदारी, सहकार्य र प्रदेशभित्रको सामाजिक समन्वय मजबुत बनाउन महोत्सवले ठूलो भूमिका खेल्छ। ६. युवाका लागि अवसर स्थानिय युवा उद्यमशिलता, स्टार्टअप, कला, संगीत, नाटक, खेलकुद र विभिन्न प्रतियोगिताहरूमा सहभागी भएर आफूमाथि आत्मविश्वास बटुल्ने अवसर पाउछन । साथै महोत्सवले नयाँ प्रतिभा पहिचान गर्न समेत मद्दत पुर्‍याउँछ। ७. प्रदेशको सकारात्मक छवि निर्माण सुदूरपश्चिमलाई प्रायः भौगोलिक रूपमा चुनौतीपूर्ण क्षेत्रको छवि बनाइँदै आइएको छ।
महोत्सव भने यसको संस्कृति, क्षमता, सौन्दर्य र सम्भावनाको उज्यालो पक्षलाई राष्ट्रिय–अन्तराष्ट्रिय स्तरमा उजागर गर्ने माध्यम बन्न पुगेको छ।