मधेश प्रदेशसभाको सभामुख चयनका लागि प्रक्रिया सुरू - www.sutranews.com

जनकपुरधाम । मधेश प्रदेशसभाको सभामुख पद चयन गर्नका लागि प्रक्रिया सुरू भएको छ । बुधबार बसेको प्रदेशसभाको बैठकमा उपसभामुख बबिता राउत इशरले रिक्त रहेको सभामुख पदका लागि चयन प्रक्रिया अगाडि बढाइएको जानकारी गराएकी छन् । उपसभामुख राउतले आगामी पुस ६ गत्ते आइतबार सभामुख पदका लागि निर्वाचन हुने जानकारी दिएकी छन् । उनले मधेश प्रदेश सभाका सचिव बासुप्रसाद कोईरालालाई सभामुखको निर्वाचन कार्यक्रम सम्बन्धी सूचना पुस ५ गत्ते प्रकाशन गर्न निर्देशन समेत दिएकी छन् । गत मंसिर ३ गत्ते तत्कालिन सभामुख रामचन्द्र मण्डलमाथि लगाइएको महाभियोग बहुमतले पारित भएदेखि सभामुखको पद रिक्त रहेको थियो । प्रदेश सभाको बैठक पुस ४ गत्ते शुक्रबार दिउँसो ४ बसेसम्मका लागि स्थगित भएको छ ।