इजिप्टमा युद्धविराम वार्ता : इजरायल र हमासका प्रतिनिधि भेला - nagariknews.nagariknetwork.com

राष्ट्रपति डोनाल्ड ट्रम्पले गाजामा करिब दुई वर्षदेखि जारी युद्ध अन्त्य गर्न वार्ताकारहरूलाई ‘छिटो अघि बढ्न’ आग्रह गरेसँगै हमास, इजरायल र संयुक्त राज्य अमेरिकाका प्रतिनिधिहरू सोमबार इजिप्टमा वार्ताका लागि भेला भएका छन्। इजरायली जेलमा राखिएका प्यालेस्टिनीहरूको बदलामा गाजामा लडाइँ अन्त्य गर्ने र बन्दीहरूलाई रिहा गर्ने ट्रम्पको प्रस्तावमा हमास र इजरायल दुवैले सकारात्मक प्रतिक्रिया दिएका छन्। वार्ताकारहरूले अप्रत्यक्ष वार्ताबाट आगामी छलफलका विषयहरू टुङ्गो लगाउने आशा गरेका छन्। स्मरण रहोस्, सन् २०२३ अक्टोबर ७ मा इजरायलमाथि हमासले आक्रमण गरेको थियो भने यसको ठीक दुई वर्षपछि युद्धविराम वार्ताका लागि मिति तय गरिएको छ। ट्रम्पको योजनामा हमासको निशस्त्रीकरणको परिकल्पना गरिएको भए पनि लडाकू समूहले यसलाई स्वीकार गर्ने सम्भावना कम देखिएको छ तर अन्य बुँदाहरूमा युद्धरत दुवै पक्ष सकारात्मक देखिएका छन्। प्रस्तावमा गाजा पट्टीबाट इजरायली सेनालाई पूर्ण रूपमा फिर्ता गर्ने पनि व्यवस्था छ तर इजरायलका प्रधानमन्त्री बेन्जामिन नेतन्याहूले बन्धकहरूको रिहाइलाई सुरक्षित गर्दै ‘भित्र’ सेनाहरू पुनः तैनाथ गर्ने बताएका छन्। इस्लामिक समूहले रिहाइका लागि प्रस्ताव गरेका प्यालेस्टिनी कैदीहरूको नामलाई लिएर यसअघिका चरणको वार्ता पनि रोकिएको थियो। गत महिना दोहामा इजरायली आक्रमणमा समूहका अन्य नेताहरूसँग लक्षित भएका हमासका प्रमुख वार्ताकार खलिल अल–हयाले सोमबार कायरोमा इजिप्ट र कतारका मध्यस्थकर्ताहरूसँग भेट गर्ने कार्यक्रम रहेको समूहका एक वरिष्ठ अधिकारीले एएफपीलाई बताए। अधिकारीहरूले कडा सुरक्षामा बन्द ढोकाभित्र भइरहेको वार्ताको रसदको बारेमा थोरै विवरण दिएका छन्। वार्ताले ‘अस्थायी युद्धविरामको मिति निर्धारण गर्ने’ प्रयास गर्ने हमासका अधिकारीले बताएका छन्। साथै वार्ताले योजनाको पहिलो चरणको लागि अवस्था सिर्जना गर्नेछ, जसमा गाजामा राखिएका ४७ बन्धकहरूलाई सयौँ प्यालेस्टिनी बन्दीहरूको बदलामा रिहा गरिनेछ। एएफपी