एआई पूर्वाधारमा बढ्दो लगानीका कारण मेमोरी चिपको आपूर्तिमा समस्या: रिपोर्ट - www.technologykhabar.com

विश्वभर बढ्दै गएको मेमोरी चिपको तीव्र अभावले कृत्रिम बुद्धिमत्ता र उपभोक्ता इलेक्ट्रोनिक्स कम्पनीहरूलाई सीमित आपूर्तिका लागि प्रतिस्पर्धा गर्न बाध्य बनाएको छ जसले उपकरणहरूले डाटा भण्डारण गर्न प्रयोग हुने महत्त्वपूर्ण तर साधारण देखिने घटकहरूको मूल्य तीव्र रूपमा बढिरहेको छ। जापानी इलेक्ट्रोनिक्स स्टोरहरूले हाल ग्राहकले कति हार्ड-डिस्क ड्राइभ किन्न पाउने भन्नेमा सीमा लगाउन थालेका छन्। चिनियाँ स्मार्टफोन निर्माताहरूले मूल्य वृद्धि हुन सक्ने चेतावनी दिइरहेका छन्। माइक्रोसफ्ट, गुगल र बाइटडान्सजस्ता ठूला प्रविधि कम्पनीहरूले माइक्रोन, सामसङ इलेक्ट्रोनिक्स र एसके हाइनिक्स जस्ता मेमोरी–चिप निर्माताबाट आवश्यक आपूर्ति सुरक्षित गर्न दौडिरहेका छन्। यो अभाव यूएसबी ड्राइभ र स्मार्टफोनमा प्रयोग हुने फ्ल्यास चिपदेखि डाटा सेन्टरमा एआई चिपलाई चलाउन प्रयोग हुने उच्च–गतिका एचबीएम चिपसम्म लगभग सबै प्रकारका मेमोरीमा फैलिएको छ। केही खण्डमा मूल्य फेब्रुअरीदेखि दोब्बरभन्दा बढी बढेको छ, मार्केट–रिसर्च संस्था ट्रेण्डफोर्सका अनुसार यो प्रवृत्तिले बजारमा थप वृद्धि हुने अपेक्षा गर्ने व्यापारीहरूलाई पनि आकर्षित गरेको छ। यसको प्रभाव प्रविधि क्षेत्रभन्दा बाहिर पनि पुग्न सक्ने चिन्ता विशेषज्ञहरूले व्यक्त गरेका छन्। धेरै अर्थशास्त्री र उद्योगपति अनुसार लामो समयसम्म अभाव कायम रहनुले एआईमा आधारित उत्पादकत्व वृद्धि सुस्त बनाउने र डिजिटल पूर्वाधारमा लगानी भएका सयौं अर्ब डलरका परियोजना ढिलो हुने जोखिम छ। साथै धेरै देश महंगी नियन्त्रण गर्ने प्रयास गरिरहेका बेला यसले थप मुद्रास्फीतिको दबाब सिर्जना गर्न सक्छ। “मेमोरी अभाव अब साधारण घटक स्तरको चिन्ताबाट उठेर व्यापक आर्थिक जोखिममा रूपान्तरण भएको छ,” प्रविधि सल्लाहकार संस्था ग्रेहाउण्ड रिसर्चका प्रमुख सन्चित विर गोगियाले भने। एआई पूर्वाधार निर्माण “भौतिक आवश्यकता पूरा गर्न नसक्ने आपूर्ति शृंखलासँग ठोक्किएको” उनले बताए। १७ ओटा चिप निर्माता र वितरकका कार्यकारीसहित झन्डै ४० जनासँग गरेको अन्तर्वार्तामा आधारित यो रिपोर्टले उन्नत चिपको तीव्र माग पूरा गर्ने उद्योगका प्रयासहरूले दोहोरो समस्या पैदा गरेको देखाउने रोयटर्सले जनाएको छ। यसले एआई प्रतिस्पर्धाका लागि आवश्यक उच्च–स्तरका सेमीकन्डक्टर उत्पादन अझै पर्याप्त नभएको र परम्परागत मेमोरी उत्पादन घटाएपछि स्मार्टफोन, पीसी र उपभोक्ता इलेक्ट्रोनिक्सका लागि आपूर्ति झनै सङ्कुचित हुँदै गएको छ। केही कम्पनीहरू अब पुनः सन्तुलनमा फर्किन दौडिरहेका छन्। चीन र जापानका इलेक्ट्रोनिक्स रिटेलर तथा कम्पोनेन्ट आपूर्तिकर्ताले वर्णन गरेका मूल्यवृद्धि र आपूर्तिका लागि प्रविधि कम्पनीहरूको वैश्विक दौडबारेका विवरण यहाँ पहिलो पटक रिपोर्ट गरिएको हो। कम्प्युटर र फोनमा प्रयोग हुने मुख्य डीआरएएम मेमोरी आपूर्तिकर्ताको औसत भण्डार स्तर जुलाईमा तीनदेखि आठ हप्तामा रहेकोमा अक्टोबरमा घटेर केवल दुईदेखि चार हप्ता पुगेको छ। ट्रेण्डफोर्सका अनुसार २०२४ को अन्त्यमा यो समय १३ देखि १७ हप्ता थियो। यो अभाव लगानीकर्ताहरू एआई पूर्वाधारमा लगानी भएका ठूलो रकमले कुनै बबल सिर्जना गरेको हो कि भन्ने प्रश्न उठाइरहेका बेला देखिएको हो। केही विश्लेषकले आगामी महिनाहरूमा ठूलो पहिरो आउने र वित्तीय रूपमा बलिया ठूला कम्पनीले मात्र मूल्यवृद्धि थेग्न सक्ने अनुमान गरेका छन्। एक मेमोरी–चिप कार्यकारीले अभावका कारण आगामी डाटा–सेन्टर परियोजनाहरू ढिलो हुने बताएको रोयटर्सले उल्लेख गरेको छ। नयाँ उत्पादन क्षमता निर्माण गर्न कम्तीमा दुई वर्ष लाग्छ, तर माग घट्ने सम्भावना भएकाले चिप निर्माता अत्यधिक उत्पादन क्षमता निर्माण गर्न हिचकिचाइरहेका उक्त व्यक्तिले बताए। The post एआई पूर्वाधारमा बढ्दो लगानीका कारण मेमोरी चिपको आपूर्तिमा समस्या: रिपोर्ट appeared first on Technology Khabar.