शब्द, स्वर र संवेदना बोल्ने बालेनको ‘कुन मन्दिरमा’, २४ घण्टा नपुग्दै मिलियन क्लबमा - www.sutranews.com

काठमाडौं । काठमाडौं महानगरपालिकाका मेयर बालेन शाहको नयाँ गीत ‘कुन मन्दिरमा : आम नेपाली बुवा’ले रिलिज भएको २४ घण्टामै युट्युबमा १० लाख भ्युज पार गर्दै नयाँ कीर्तिमान बनाएको छ। नेपाली संगीत क्षेत्रमा निकै सीमित गीतहरूले मात्र यस्तो उपलब्धि हासिल गरेका छन्। सामाजिक सन्देश बोकेको गीतले छोटो समयमै दर्शक–स्रोताबाट व्यापक प्रतिक्रिया पाएको छ। बालेनले आफ्नो र्याप बुवालाई समर्पित गरेका छन्। र्यापको कोरसमा महाकवि लक्ष्मीप्रसाद देवकोटाको कविता ‘कुन मन्दिरमा जान्छौँ यात्री’ समावेश छ । कोरस गायन दीक्षा उप्रेतीको छ। ‘आम नेपाली बुवा’मा र्याप सँगै शब्द पनि बालेनको छ। आम बुवाको संघर्ष, जिम्मेवारी, भावनात्मक सम्बन्धलगायत समाजको यथार्थ ¥यापमा समावेश गरिएको छ । भिडियोमा चलचित्रका दृश्यहरू समेटिएको छ। यो गीत फिल्म ‘झरीपछिको इन्द्रेणी’को लागि बनाइएको हो। नागराज इन्टरटेन्मेन्ट प्रालिले निर्माण गरेको सिनेमाबाट अभिनेता गणेश उप्रेती लामो समयपछि कमव्याक गर्दैछन्। यो सिनेमा छायांकनका लागि उप्रेती अमेरिकाबाट नेपालम फर्किएका थिए। सिनेमामा गणेशसहित रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे (पाँडे), प्रियना आचार्य (मुन्नी), अंशु महर्जन, राजेन्द्र नेपाली, लक्षणा राईको अभिनय छ। आगामी पौष ४ गते देशब्यापी रिलिज हुने यो सिनेमाबाट कलाकार विमोचन दवाडी र जेसिका पोखरेलले डेब्यू गर्दैछन्। बाल कलाकारमा दिप्सन चिलवालले पनि अभिनय गरेको निर्माण कम्पनीले जनाएको छ । सिनेमाको एक गीतमा मोडल अञ्जली अधिकारी र कोरियोग्राफर प्रदीप लामा पनि विशेष भूमिकामा देखिनेछन्। निर्देशक घिमिरे स्वयंको कथा रहेको सिनेमाको पटकथा र संवादमा गणेश कार्की, विशाल घिमिरेले मिलेर लेखेका हुन्। सिनेमाका छायांकार बुद्ध थापा हुन्। अनिशा सेन्दाङ लिम्बु निर्मात्री, अनु थापा, पंकज खड्का, सिर्जना खड्का, सुवास शर्मा र राम कार्कीको सह–निर्माता तथा लाइन प्रोड्युसरमा योगेश खतिवडा र विनोद कँडेल रहेको छन्।