रास्वपाले तोक्यो प्रत्यक्षतर्फ उम्मेदवार बन्न २५ हजार शुल्क - arthasanjal.com

काठमाडौं । राष्ट्रिय स्वतन्त्र पार्टी (रास्वपा) ले आगामी फागुन २१ गते हुने प्रतिनिधिसभा सदस्य निर्वाचनका लागि प्रत्यक्षतर्फका उम्मेदवार छनोट गर्न उम्मेदवारी आह्वान गरेको छ। ‘पहिलो हुने निर्वाचित हुने’ प्रणालीअन्तर्गत पार्टीको आन्तरिक छनोट प्रक्रियामा सहभागी हुन इच्छुक र योग्य पार्टी सदस्यलाई आवेदन दिन आग्रह गरिएको हो। इच्छुक उम्मेदवारका लागि रास्वपाले आवेदन शुल्क २५ हजार रुपैयाँ तोकेको छ। उम्मेदवार छनोट रूपरेखाबमोजिम मङ्सिर २१ गतेदेखि उम्मेदवारी आवेदन खुला गरिएको छ। उम्मेदवारी आवेदन रास्वपाको आधिकारिक मोबाइल एपमार्फत दिन सकिनेछ। पार्टीले आइतबार जारी गरेको विज्ञप्तिअनुसार, योग्यता पुगेका इच्छुक पार्टी सदस्यहरूले आर्थिक अभावका कारण आवेदन शुल्क तिर्न नसक्ने अवस्था भएमा आफ्नो आवेदनसाथ तोकिएका कागजातहरू अनिवार्य रूपमा पार्टी केन्द्रीय कार्यालय वा इमेलमार्फत उम्मेदवार छनोट समितिमा पेस गर्नुपर्नेछ।