अष्ट्रेलियामा लागू सामाजिक सञ्जाल चलाउन १६ वर्षको उमेर हदको नियम यूट्युबलाई स्वीकार्य - www.technologykhabar.com

गुगल अन्तर्गतको यूट्युबले बुधबार अष्ट्रेलियाका लाखौं प्रयोगकर्ता र सामग्री सिर्जनाकर्तालाई “निराशाजनक अपडेट” सार्वजनिक गर्दै १६ वर्षभन्दा कम उमेरका प्रयोगकर्तालाई केही दिनभित्रै खाताबाट बाहिर राख्ने निर्णय गरेको छ, किनकि कम्पनीले विश्वमै पहिलो पटक लागू भएको किशोर–केन्द्रित सामाजिक सञ्चार माध्यम प्रतिबन्ध पालना गर्ने भएको हो। यो निर्णयले इन्टरनेट कम्पनी र अष्ट्रेलियाली सरकारबीचको विवाद अन्त्य गरेको छ। सरकारले सुरुमा यूट्युब लाई शिक्षामूलक प्रयोगका कारण उमेर प्रतिबन्धबाट छुट दिएको थियो। गुगलले आफूलाई सो प्रतिबन्धमा समेटिएको विषयमा कानुनी परामर्श लिइरहेको बताएको थियो। “यूट्युबमा साइन इन गर्न अब दर्शक १६ वर्ष वा सो भन्दा बढी उमेरको हुनुपर्नेछ,” कम्पनीले एक विज्ञप्तिमा भनेको छ। “यो निराशाजनक अपडेट हो। यस कानुनले अनलाइन बालसुरक्षा सुनिश्चित गर्ने आफ्नो लक्ष्य पूरा गर्ने छैन, बरु अष्ट्रेलियाका किशोरलाई यूट्युबमा झनै असुरक्षित बनाउनेछ।” अष्ट्रेलियाको यो प्रतिबन्ध अन्य देशहरूले पनि ध्यानपूर्वक हेरिरहेका छन्, किनकि यसले ठूलो सामाजिक सञ्चार माध्यम प्लेटफर्महरू—धेरैजसो अमेरिकी कम्पनीहरू—बालसुरक्षा र डिजिटल पहुँचबीच कसरी सन्तुलन राख्ने भन्ने विषयमा वैश्विक उदाहरण बनाउन सक्छ। अष्ट्रेलियाली सरकारका अनुसार प्लेटफर्महरूले बालबालिकालाई हानिकारक सामग्रीबाट जोगाउन पर्याप्त काम नगरेको प्रमाण बढिरहेको छ। यूट्युबले १६ वर्षभन्दा कम उमेरका प्रयोगकर्तालाई डिसेम्बर १० देखि स्वतः खाताबाट साइन आउट गरिने बताएको छ, जसले उनीहरूले सब्सक्राइब गर्न, लाइक गर्न वा टिप्पणी गर्न नसक्ने तर साइन आउट अवस्थामा सामग्री हेर्न सक्नेछन्। यसले कम उमेरका सामग्री सिर्जनाकर्ताले पनि लगइन गर्न वा सामग्री अपलोड गर्न नसक्ने अर्थ राख्छ। कम्पनीले उमेर कसरी प्रमाणित गर्ने भन्नेबारे केही उल्लेख गरेको छैन। रोयटर्सका अनुसार कम्पनीले प्रतिबन्धले इन्टरनेटलाई सुरक्षित नबनाउने दाबी दोहोर्‍याउँदै कम उमेरका प्रयोगकर्ताका अभिभावकलाई पठाएको इमेलमा “पेरिन्टल कन्ट्रोल केवल तपाईंका किशोर वा प्रि–टिन प्रयोगकर्ता साइन इन हुँदा मात्र काम गर्छ; अब तपाईंले सेट गरेका विकल्प लागू हुने छैनन्” भनेको छ। क्यानबेरामा पत्रकारसँग कुरा गर्दै सञ्चारमन्त्री अनिका वेल्सले “साइन आउट अवस्थामा आफ्नो प्लेटफर्म कति असुरक्षित छ भनेर यूट्युब ले सधैं याद गराइरहनु अचम्मको कुरा हो” भनिन्। “यदि यूट्युबले आफैं असुरक्षित भएको र आयु–प्रतिबन्धित प्रयोगकर्ताका लागि अनुपयुक्त सामग्री रहेको स्वीकार गर्छ भने, त्यो समस्या यूट्युबले नै समाधान गर्नुपर्छ,” उनले भनिन्। कानुनअनुसार प्लेटफर्महरूले १६ वर्षभन्दा कम उमेरका प्रयोगकर्तालाई खाता बनाउन नदिने व्यवस्था छ, उल्लंघन गरेमा ४९.५ मिलियन अष्ट्रेलियन डलर (३२.५ मिलियन अमेरिकी डलर) सम्मको जरिवाना तोकिएको छ। मेटाको फेसबुक र इन्स्टाग्राम, टिकटक र स्न्यापको स्न्यापच्याटले यसअघि नै प्रतिबन्ध पालना गर्ने बताएका छन्। सरकारले प्रतिबन्धभित्र पर्ने सूचीमा राखेका प्लेटफर्ममध्ये केवल एलन मस्कको एक्स र सन्देश बोर्ड रेडिटले मात्र कानुन मान्नेबारे सार्वजनिक रूपमा प्रतिबद्धता जनाएका छैनन्। वेल्सलाई कम परिचित सामाजिक सञ्चार माध्यमहरू लोकप्रिय हुँदै गएको पाहिँदा सोधिएको प्रश्नमा उनले प्रविधि क्षेत्र “गतिशील” भएको र “प्रयोगकर्ताको सर्नेसर्ने प्रवृत्तिअनुसार” सरकारको सूची विस्तार गर्नुपर्ने बताइन्। The post अष्ट्रेलियामा लागू सामाजिक सञ्जाल चलाउन १६ वर्षको उमेर हदको नियम यूट्युबलाई स्वीकार्य appeared first on Technology Khabar.