विद्युतको बक्यौता महसुल असुलीको प्रक्रिया नयाँ चरणमा प्रवेश गर्‍यो : मन्त्री घिसिङ - corporatekhabar.com

काठमाडौं । उर्जामन्त्री कुलमान घिसिङले राजनीतिक नेतृत्वदेखि आम सर्वसाधारणसम्मलाई तरङ्गित बनाएको विद्युतको बक्यौता महसुल असुलीको प्रक्रिया अब नयाँ चरणमा प्रवेश गरेको बताएका छन् । घिसिङले विगतमा आम सर्वसाधारण लोडसेडिङको अँध्यारोले आक्रान्त भएका बेला डेडिकेटेड फिडर तथा ट्रङ्कलाइन संरचनामार्फत विद्युत उपभोग गर्ने उद्योगहरूलाई तोकिएको प्रिमियम महसुलको बक्यौता रकममध्ये पहिलो किस्ता अधिकांश उद्योगहरूबाट भुक्तानी भएको उल्लेख गरेका छन् । नेपाल विद्युत प्राधिकरणबाट कानुनसम्मत रूपमा पटक–पटक चालिएका कदममा राजनीतिक तहबाट हुने हस्तक्षेपका कारण असुलीमा अवरोध सिर्जना हुँदा यो विषय राष्ट्रिय सरोकारको मुद्दा बनेको घिसिङले बताएका छन् । उनले भनेका छन्, ‘अवस्था यस्तोसम्ममा पुगेको थियो कि राज्यले उठाउनुपर्ने महसुल बक्यौतालाई जिम्मेवार पदमा रहेका केही व्यक्तिबाट निस्तेज पार्ने सुनियोजित प्रयासहरू भएका थिए । तर, सबैको निरन्तर चासो, निगरानी र खबरदारी कारण अब बक्यौता असुली ठोस परिणामतर्फ अग्रसर भएको छ ।’ मन्त्री घिसिङले हालको विषम परिस्थितिमा देशप्रतिको आफ्नो दायित्वबोधका साथ बक्यौता रकमको किस्ता तिर्न सुरू गरेका सम्पूर्ण उद्योगीहरूलाई धन्यवाद दिँदै बक्यौता असुलीमा आवश्यक सहयोग, समन्वय र सहजीकरण प्रदान गर्ने सबैप्रति आभार व्यक्त गरेका छन् । The post विद्युतको बक्यौता महसुल असुलीको प्रक्रिया नयाँ चरणमा प्रवेश गर्‍यो : मन्त्री घिसिङ appeared first on corporatekhabar : Nepals first corporate news magazine and portal.