तेह्र वर्षपछि महिला कबड्डी विश्वकप हुँदै, नेपाली टोलीको बिदाइ - nagariknews.nagariknetwork.com

दोस्रो महिला कबड्डी विश्वकप खेल्ने नेपाली टोलीको बिदाइ गरिएको छ। नेपाल ओलम्पिक कमिटी (एनओसी)ले शुक्रबार एक कार्यक्रम आयोजना गरी टोलीको बिदाइ गरेको हो। कार्यक्रममा एनओसीका अध्यक्ष जीवनराम श्रेष्ठले खेलाडीलाई प्रतियोगितामा शतप्रतिशत दिएर पूर्ण समर्पणका साथ देशको गौरवका लागि खेल्न आग्रह गरे। महिला कबड्डी विश्वकप बंगलादेशको मिरपुरमा हुँदैछ । यसअघि सो प्रतियोगिता भारतमा हुने भनिएको थियो । महिला कबड्डी विश्वकप १३ वर्षपछि हुन लागेको हो । सन् २०१२ मा भारतको पटनामा पहिलो पटक महिला कबड्डी विश्वकपको आयोजना भएको थियो । भारत महिला कबड्डीको पहिलो च्याम्पियन बनेको थियो । सो प्रतियोगितामा इरान दोस्रो तथा जापान तेस्रो भएका थिए ।आगामी नोभेम्बर १५ देखि २५ सम्म हुने प्रतियोगितामा आयोजक बंगलादेश, डिफेन्डिङ च्याम्पियन भारत र नेपालसहित इरान, जापान, जर्मनी, केन्या, चाइनिज ताइपेई, थाइल्यान्ड, युगान्डा, अर्जेन्टिना र इन्डोसियाले प्रतिस्पर्धा गर्ने छन् । नेपाल समूह 'ए' मा रहेको छ । नेपालले पहिलो खेल नोभेम्बर १७ मा खेल्नेछ । नेपाली कबड्डी टिमका पदाधिकारीले विश्व वरीयतामा तेस्रो स्थानमा रहेको नेपालले उत्कृष्ट प्रदर्शनसहित विश्वकप पदक हासिल गर्ने घर फर्कने विश्वास व्यक्त गरेका छन् । मानमती विष्टको कप्तानीमा रहेको टिममा जयन्ती बडु उपकप्तान छन्। अन्य खेलाडीमा गंगा घिमिरे, रविना चौधरी, मेनुका राजवशीं, मनिषा जोशी, सृजना धानुक, आशिका कुँवर, सन्जु थामी, मिना नेपाली, बिनिता क्षेत्री, आस्मा यादव, सृजना थारु र उरुसा शाक्य छन्। टिमको प्रशिक्षकमा विष्णु दत्त भट्ट, प्रशिक्षकमा हरिना थापा र व्यवस्थापकमा शरद दर्शनधारी र टेक्निकल अफिसरमा रमेशचन्द्र ओझा रहेका छन् ।