ओलीलाई ईश्वरले भने– प्रतिनिधि छनोटमा पक्षपात भयो - corporatekhabar.com

काठमाडौँ । नेकपा एमालेका वरिष्ठ उपाध्यक्ष ईश्वर पोखरेलले विभिन्न जिल्लामा भएको प्रतिनिधि छनोटका क्रममा एकलौटी गरेको भन्दै गुनासो गरेका छन् । नेता पोखरेलसहित उपाध्यक्ष सुरेन्द्र पाण्डे, अष्टलक्ष्मी शाक्य, योगेश भट्टराई लगायतका नेताहरू बिहीबार ओली निवास गुण्डु पुगेर प्रतिनिधि चयनमा भएको विवादबारे अध्यक्ष ओलीलाई ध्यानाकर्षण गराएका हुन् । ओखलढुङ्गा, धनकुटा र दाङलगायतका केही जिल्लामा एमाले महाधिवेशन प्रतिनिधि छनोटका क्रममा विवाद भएको थियो । सोही विषयमा पोखरेलसहितका नेताहरू ओलीलाई भेट्न गुण्डु पुगेका हुन् । ती जिल्लामा छनोट भएका प्रतिनिधिलाई सङ्गठन विभागले अस्वीकार गर्दै पुन: निर्वाचन प्रक्रिया अघि बढाउन निर्देशन दिएको थियो । ओखलढुङ्गामा पोखरेल पक्षकामात्रै प्रतिनिधि छनोट भएका थिए भने धनकुटामा ओली पक्षका र दाङमा शंकर पोखरेल पक्षका मात्र छनोट भएका थिए ।‘उहाँहरूको कन्सर्न ओखलढुङ्गामा थियो । त्यहाँ छनोट भएका प्रतिनिधि नखोसिउन् भन्ने हो’, ओली निकट एक नेताले भने, ‘खासगरी प्रतिनिधि छनोटमा विवाद देखिएका स्थानमा चासो देखाएर कुरा गर्नुभयो ।’ त्यसक्रममा पोखरेलले दाङ र धनकुटामा आफ्नो पक्षका प्रतिनिधि छनोटमा एकलौटी गरेको भन्दै गुनासो गरेका थिए । एमालेको ११ औँ महाधिवेशनमा ओली र पोखरेल समूह नै बनाएर प्रतिस्पर्धा गर्ने तयारीमा छन् । The post ओलीलाई ईश्वरले भने– प्रतिनिधि छनोटमा पक्षपात भयो appeared first on corporatekhabar : Nepals first corporate news magazine and portal.