पूर्वसंरक्षण अधिकृत रामप्रित यादवको सम्मानमा छावाको नाम - nagariknews.nagariknetwork.com

चितवन राष्ट्रिय निकुञ्जका पूर्वसंरक्षण अधिकृत रामप्रित यादवको सम्मानमा ‘तमोरकली’ नामक हात्तीले जन्माएको छावाको नाम ‘रामप्रितगज’ राखिएको छ।खोरसोरस्थित हात्ती प्रजनन र तालिम केन्द्रमा आज भएको न्वारनमा छावाको नाम ‘रामप्रितगज’ राखिएको हो। चितवन राष्ट्रिय निकुञ्जका प्रमुख संरक्षण अधिकृत डा. गणेश पन्तले चितवन निकुञ्जको संरक्षणमा स्थापनाकालदेखि नै योगदान दिएका रामप्रितको सम्मानमा रामप्रितगज नामकरण गरिएको बताए।‘विभिन्न संरक्षणकर्मीको सम्मानमा हात्तीको छावा नामकरण गर्दै आएका छौं, यसपटक चितवन निकुञ्जको संरक्षणमा सुरुदेखि नै योगदान दिएका संरक्षणकर्मीको सम्मानमा नामकरण गरेका हौं,’ उनले भने।चितवन निकुञ्ज स्थापनाकालमा यादव रेञ्जर पदमा रहेर संरक्षणमा खटिएका थिए। उनले निकुञ्जको प्रमुख संरक्षण अधिकृत भएर पनि काम गरिसकेका छन्। यादव हाल अवकाश भइसके पनि संरक्षणको क्षेत्रमा सक्रिय छन्।उनकै उपस्थितिमा हात्तीको नामकरण गरिएको हो। सो क्रममा यादवले भने, ‘मैले सुरुदेखि यो निकुञ्जको संरक्षणमा सक्रिय हुन पाएँ, मैले के–कति गर्नसके भनेर अरुले मूल्यांकन गर्नेछन्, मेरो सम्मानमा हात्तीको नामकरण हुँदा गर्व महसुस भएको छ।’‘रामप्रितगज’ तमोरकली हात्तीको तेस्रो सन्तान हो। रामप्रितगजको जन्म यही साउन ७ गते भएको हो। यसलाई ‘रोनाल्डो’ नामक हात्तीको सन्तान मानिएको छ।यहाँ जन्मिने भाले छावाको नामको पछाडि ‘गज’ र पोथी हात्तीको नामको पछाडि ‘कली’ राख्ने प्रचलन छ। चालु आर्थिक वर्ष २०८२/८३ मा जन्मिएको यो पहिलो छावा हो। गत आव २०८१/८२ मा पाँचवटा छावाको जन्म भएको हात्ती प्रजनन केन्द्रका प्रमुख मनपुरन चौधरीले जानकारी दिए।हाल यस प्रजनन केन्द्रमा नौवटा ठूला हात्ती, छवटा तालिम प्राप्त हात्ती र सातवटा तालिम नगरेका गरी २२ वटा हात्ती छन्। प्रजनन केन्द्र र निकुञ्जभित्रका विभिन्न पोस्टमा गरी हाल ५८ वटा हात्ती छन्। विसं २०४४ मा स्थापना भएको प्रजनन केन्द्र र तालिम केन्द्रमा २०५० सालदेखि बच्चा जन्मिन सुरु भएको हो। हालसम्म यस केन्द्रमा ६९ वटा बच्चा जन्मिएका छन्। जसमध्ये छवटा हात्ती विभिन्न कारणले मरिसकेका छन्। रासस