फाल्कन ९ रकेटले आफ्नो ५५० औं अवतरणअघि प्रक्षेपण गर्यो २७ ओटा स्टारलिङ्क स्याटेलाइटको समूह - www.technologykhabar.com

पहिलो रकेट चरण सफलतापूर्वक अवतरण गराएको करिब १० वर्ष पूरा हुनै लाग्दा स्पेसएक्सले आज (डिसेम्बर १४) आफ्नो ५५०औँ फाल्कन ९ बुस्टर पुनःप्राप्त गरेको छ। यो अवतरण फाल्कन ९ रकेटको पहिलो चरणले २७ वटा स्टारलिङ्क उपग्रह अन्तरिक्षमा पठाएपछि भएको हो। रकेटले क्यालिफोर्नियाको भान्डेनबर्ग स्पेस फोर्स बेसस्थित स्पेस लन्च कम्प्लेक्स ४ ईस्टबाट आइतबार बिहान १२:४९ बजे ईएसटी (०५:४९ जीएमटी वा स्थानीय समयअनुसार डिसेम्बर १३ राति ९:४९ बजे पीएसटी) उडान भरेको थियो। रकेटको माथिल्लो चरणले प्रक्षेपणपछि करिब एक घण्टामा उपग्रहहरूलाई तल्लो पृथ्वी कक्षमा तैनाथ गर्ने तालिका रहेको थियो। सन् २०१५ डिसेम्बर २१ मा भएको पहिलो फाल्कन ९ अवतरण जमिनमै भएको थियो भने, आइतबारको उडानमा प्रयोग भएको बुस्टर (बी१०९३) ले आफ्ना नौवटा मर्लिन इन्जिनमध्ये एउटा प्रयोग गर्दै चारवटा अवतरण खुट्टा खोल्यो र प्रशान्त महासागरमा तैनाथ स्वायत्त ड्रोन जहाज “अफ कोर्स आइ स्टिल लभ यू” मा अवतरण गर्‍यो। स्पेस डटकमका अनुसार यो उडानसँगै उक्त बुस्टरले अन्तरिक्षमा जाने र फर्किने आफ्नो नवौँ यात्रा पूरा गरेको छ। २७ वटा नयाँ उपग्रह (ग्रुप १५–१२) थपिएसँगै, स्टारलिङ्क मेगाकन्स्टेलेसनमा हाल ९,३०० भन्दा बढी सक्रिय उपग्रह रहेका छन्। सन् २०१९ देखि अहिलेसम्म १०,००० भन्दा बढी स्टारलिङ्क उपग्रह प्रक्षेपण भइसकेका छन्। स्टारलिङ्क नेटवर्कले विश्वका विभिन्न क्षेत्रमा ब्रोडब्यान्ड इन्टरनेट सेवा उपलब्ध गराउनुका साथै केही विमानमा वाइफाइ र छानिएका सेवा प्रदायकमार्फत मोबाइल–टु–स्याटेलाइट सेवा पनि उपलब्ध गराउँछ। आइतबारको प्रक्षेपण सन् २०२५ मा गरिएको स्पेसएक्सको १६२औँ फाल्कन ९ उडान हो भने समग्रमा ५८०औँ उडान हो। The post फाल्कन ९ रकेटले आफ्नो ५५० औं अवतरणअघि प्रक्षेपण गर्यो २७ ओटा स्टारलिङ्क स्याटेलाइटको समूह appeared first on Technology Khabar.