विजया दशमी २०८० को टीकाको उत्तम साइत, कुन देशमा कतिबेला छ ?

अन्तर्राष्ट्रिय पञ्चाङ्ग निर्णायक समितिले २०८० सालको बडादशैं (विजया दशमी)को टीका ग्रहणका लागि विभिन्न देश अनुसारको शुभ साइत सार्वजनिक गरेको छ ।

हरेक देशको स्थानीय पञ्चाङ्गअनुसार एउटै प्रकृतिको मुहूर्त फरक समयमा हुने गरेको हुन्छ । नेपालमा शुभमुहूर्त भएको बेला अस्ट्रेलिया, बेलायत र अमेरिकामा या अन्य देशहरुमा अर्कै प्रकृतिको मुहूर्त चलिरहेको हुन्छ । त्यसैले स्थानीय पञ्चाङ्गबाट मात्र शुभमुहूर्त ज्ञान गर्न सकिन्छ । नेपालको पञ्चाङ्ग र समय नेपालका लागि मात्र उपयोगी हुन्छ।

विदेशमा बस्ने नेपालीहरूले नेपालको स्थानीय पञ्चाङ्गअनुसार चाडपर्व मनाउदा गलत समय परेको तथ्यलाई हृदयंगम गरी नेपालमा गठित अन्तर्राष्ट्रिय पञ्चाङ्ग निर्णायक समितिले २०८० सालको बडादशैंमा विभिन्न देशका लागि टीका ग्रहण गर्ने शुभ साइत निर्धारण गरेको छ। विजया दशमीका दिन बिहान पूजा विसर्जन गरी देवीको प्रसादस्वरूप टीका र जमरा लगाउने विधान छ।

अन्तर्राष्ट्रिय पञ्चाङ्ग निर्णायक समितिद्वारा यही २०८० असोज २२ गते जारी प्रेस विज्ञप्तिमा लेखिएको छः “यस समितिको २०८०/०६/२१ गते बसेको बैठकको निर्णय अनुसार विभिन्न देशमा वसोवास गर्ने सनातन धर्मावलम्बीहरुबाट विजया दशमीको टीकाको साइत सम्बन्धमा जिज्ञासा राखिएकाले विजया दशमी २०८० को हार्दिक मंगलमय शुभकामना सहित देहायका देशहरुमा निम्नानुसारको शुभ साइत रहेको ब्यहोरा यो विज्ञप्तिमार्फत् जानकारी गराइएको छ ।”

विभिन्न स्थानका लागि टीका लगाउने शुभसाइत–

विजया दशमीको टीकाको साइत कार्तिक ७ गते मंगलवार बिहान ११ बजेर ०२ मिनेटको समय उत्तम रहेको छ । त्यसदिन बिहान ११ बजेर ०२ मिनेट अघि देवी विसर्जन गरी मान्यजनबाट देवीको प्रसादका रूपमा टीका लगाउनु उत्तम रहेको छ । टीका ग्रहण गर्दा पूर्वी मोहडा फर्किएर टीका लगाउने गरिन्छ ।

देवीको प्रसादका रूपमा देशका धेरै भागमा कोजाग्रत पूर्णिमाका दिनसम्म मान्यजनबाट टीका र आशीर्वाद थाप्ने गरिन्छ । केही भागमा भने विजया दशमीका दिनमात्र देवीको प्रसादका रूपमा टीका थाप्ने गरिएको छ ।

सदियौंदेखि नेपालमा राष्ट्रिय चाडका रूपमा दशैँ मनाइदै आइएको छ । उल्लासमय यस चाडमा विभिन्न पेशा र व्यवसायका क्रममा थातथलोभन्दा टाढा रहेका नेपालीहरु मान्यजनको आशीर्वाद थाप्न घर फर्कने गर्छन् । शरद ऋतुको उल्लासमय वातावरणमा मनाइने दशैँमा नवदुर्गा भवानीको फरक ९ रुपहरुको विशेष पूजा, आराधना गर्ने गरिन्छ ।