बडा दसैँ २०८१ सँग सम्बन्धित शुभ-साइतहरू

२०८१ सालको बडा दसैँको चहल पहल बिस्तारै हाम्रो गाउँ सहर भित्रिन थालिसकेको छ। दसैँको टिका थाप्न पुर्ख्यौली घर जानेहरू पनि आ-आफ्नो घर जान थालिसकेका छन् भने बजारमा पनि दसैँ किनमेलको चहलपहल सुरु भई सकेको छ। 

असोज १७ गते घर-घरमा घटस्थापना गरे पश्चात् बिधिबत रूपमा दसैँ सुरु हुने गर्छ। नेपाल पञ्चाङ्ग निर्णायक विकास समिति द्वारा प्रकाशित दसैँका महत्त्वपूर्ण दिनहरूको उत्तम साइत अनुसार यस पाली दसैँको टीका-जमराको उत्तम समय असोज २६ गते बिहान ११ः३६ बजे रहेको छ। 

दसैँको पहिलो दिन असोज १७ गते घटस्थापना गरिनेछ। नेपाल पञ्चाङ्ग विकास समिति अनुसार त्यस दिन बिहान ९ बजेर १६ मिनेटमा घटस्थापना गर्ने उत्तम साइत रहेको उल्लेख गरिएको छ।

बडा दसैँको अर्को महत्त्वपूर्ण दिन फूलपाती असोज २४ गते परेको छ। गोर्खा दरबार बाट ल्याइने फूलपाती हनुमान ढोका भित्राउने शुभ साइत भने बिहानको ७:११ मा रहेको छ। फूलपाती पछि असोज २५ को दिन महा अष्टमी परेको र यस वर्ष कालरात्रि र महानवमी एकै दिन अर्थात् असोज २५ गते नै परेको छ। 

मान्यजनबाट टिका-जमरा ग्रहण गर्ने दिन वा विजया दशमी असोज २६ गते रहेको छ। त्यस दिन बिहान ८:३३ बजे देवी विसर्जनको साइत रहेको छ। देवी विसर्जन पश्चात् टीका-जमरा ग्रहण गर्ने उत्तम साइत बिहानको ११:३६ बजे रहेको छ। टीका थाप्दा, टीका थाप्ने व्यक्ति पूर्व फर्किएर मान्यजन बाट टिका लगाउने गरिन्छ। सामान्यतया दशैमा देवीको प्रसाद (टिका-जमरा) लगाउन साइतको आवश्यकता नपर्ने मान्यता पनि रहेको पाइन्छ।     

असोज ३० गते दसैँको अन्तिम दिन (कोजाग्रत पूर्णिमा) हो र यसै दिन देखि दसैँ सकिने गर्छ। नेपाली पात्रो परिवार हाम्रा सम्पूर्ण प्रयोगकर्ता लगायत सम्पूर्ण नेपाली जनमा बडा दसैँ २०८१ को हार्दिक मङ्गलमय शुभ कामना व्यक्त गर्दछ।

स्रोत :नेपाल पञ्चाङ्ग निर्णायक विकास समिति