‘एजुकेट ए चाइल्ड’ अभियानमार्फत आरटीएनद्वारा देशभर १,१११ विद्यार्थीलाई छात्रवृत्ति

राउण्ड टेबल नेपाल (RTN) ले आफ्नो प्रमुख पहल ‘एजुकेट ए चाइल्ड (EAC)’ मार्फत शैक्षिक सत्र २०८२ का लागि १,१११ जना विद्यार्थीलाई छात्रवृत्ति दिने घोषणा गरेको छ। सन् २०१६ मा सुरु गरिएको यो कार्यक्रमले नेपालभरका आर्थिक रूपमा कमजोर बालबालिकाहरूलाई कक्षा १२ सम्मको अध्ययन जारी राख्न सहयोग पुर्‍याउँदै आएको छ।

यो महत्वपूर्ण उपलब्धिको अवसरमा, २०८२ सालको वैशाख २६ गते (मे ९, २०२५) देशभर ९ वटा सहरहरूमा ११ स्थानमा एकसाथ कार्यक्रमहरू आयोजना गरिएको थियो। कार्यक्रम आयोजना गरिएका सहरहरूमा विराटनगर, बुटवल, भैरहवा, वीरगञ्ज, चितवन, धनगढी, जनकपुर, काठमाडौं र नेपालगञ्ज रहेका थिए।

ती कार्यक्रममा साझेदार विद्यालयहरूलाई छात्रवृत्तिका प्रमाणपत्र वितरण गरियो। हालसम्म देशभर ३८ वटा विद्यालयहरू RTN सँग आवद्ध छन्। काठमाडौंमा आयोजित विशेष कार्यक्रम बूढानीलकण्ठस्थित श्री मदन आश्रित आदर्श माध्यमिक विद्यालयमा सम्पन्न भयो, जहाँ १४ वटा आवद्ध विद्यालयहरूले छात्रवृत्तिको प्रमाणपत्र प्राप्त गरे। कार्यक्रममा बूढानीलकण्ठ नगरपालिकाका प्रमुख श्री मिथाराम अधिकारी प्रमुख अतिथि रूपमा सहभागी हुनु भएको थियो।

‘एजुकेट ए चाइल्ड’ अभियानले विगत केही वर्षदेखि निरन्तर विस्तार पाउँदै आएको छ। यस कार्यक्रमअन्तर्गत २०२३ मा १,०५४ विद्यार्थीहरूलाई तथा २०२४ मा १,२११ विद्यार्थीहरूलाई छात्रवृत्ति प्रदान गरिएको थियो। यसले शिक्षा पहुँचमा समानता सुनिश्चित गर्न RTN को प्रतिबद्धता स्पष्ट रूपमा देखाउँछ।

यस वर्षको अभियान RTN का सदस्यहरू, व्यक्तिगत दाताहरू र व्यवसायिक संस्थाहरूको योगदानबाट सम्भव भएको हो।

राउण्ड टेबल नेपालले सम्पूर्ण सहयोगीहरूप्रति हार्दिक धन्यवाद प्रकट गर्दै शिक्षामार्फत जीवन परिवर्तन गर्ने अभियानमा अविचलित रहने प्रतिबद्धता व्यक्त गरेको छ।